【職場生存必備系列—寫作技巧(上集)】#寫作技巧的能力
上次講完把口，今次講下隻手。依家多咗時間喺屋企做嘢，同同事用文字溝通機會又多咗，稍一不留神，字裏行間得罪同事，真係死咗都唔知發生咩事。
職場上人言可畏，危機四伏，面對面溝通，有語氣、表情輔助，好少會產生誤會。但係轉到用文字溝通，簡單一個英文字「okay」，接收者都可以有唔同嘅詮釋，更何況係成段文字呢？寫封email，看似easy job，實質學問好多。明明想叫同事做A，但對方誤會做咗B；明明想公開稱讚下屬，但對方以為你質疑佢能力。字係死，人係生，對方睇完有咩感受，好多時睇你寫作功力。職場上誤會大了，同事間輕則面左左，重則包你工作受阻。
唔好以為作家先要培養寫作能力，職場上用到寫作嘅機會比比皆是。做細嘅，寫進度報告、會議紀錄；做中層嘅，寫營運報告、市場調查；做大粒嘅，寫員工表現報告、營運策略。文筆好，唔單止可以準確表達所思所想，減少溝通上誤會，仲可以合理地用文字「美化」客觀事實。另外有啲說話，用口講會太直接，但善用文字婉轉表達，殺傷力大大降低，對方都會較易入耳，同同事關係融洽，真係升職機會都大啲！
嗱，寫作文法要靠你自己學習鍛煉，不過我都可以教幾招寫作技巧，令你職場路上人見人愛，密切留意下一篇！
Search